AQShning yirik kompaniyalari aksiyalari narxi tushib ketdi
16-mart kuni AQShning yirik kompaniyalari aksiyalari narxi tushib ketdi.
Eng sezilarli pasayish Apple va Meta kompaniyalarida qayd etilib, ularning aksiyalari mos ravishda 2,21 foiz va 3,83 foizga arzonladi.
Shuningdek, Microsoft aksiyalari 1,57 foizga, Nvidia 1,58 foizga, Google 0,42 foizga, Tesla 0,96 foizga va Amazon 0,89 foizga pasaydi.
Kompaniyalar aksiyalari narxining tushishiga bozor ishtirokchilarining Federal ochiq bozor qo‘mitasi qarorini hamda muhim texnologik voqealarni kutayotgani sabab bo‘lmoqda.
Meta kompaniyasi Nebius Group bilan 12 mlrd dollarlik maxsus sun’iy intellekt quvvatlarini taqdim etish bo‘yicha yangi besh yillik kelishuvni e’lon qildi.
Bunday xarajatlar qisqa muddatda kompaniyaning marjasi va erkin pul oqimiga bosim o‘tkazishi mumkin.
Shu sababli ayrim investorlar aksiyalarni sota boshladi. Apple aksiyalarining pasayishiga esa kompaniyaning Xitoydagi App Store siyosatini o‘zgartirgani sabab bo‘ldi.
Kompaniya tartibga soluvchi organlar bosimi kuchaygani sababli Xitoydagi App Store komissiyasini 25 foizgacha, kichik dasturchilar uchun esa 15 foizdan 12 foizgacha kamaytirganini ma’lum qildi.
Bitkoin fyucherslari mustahkamlanmoqda
16-mart kuni bitkoin fyucherslari 2,83 foizga oshib, 73 334 dollarga yetdi. Bu so‘nggi olti haftadagi eng yuqori ko‘rsatkichdir.
AQShda fevral oyidagi inflyatsiya ma’lumotlari narxlar bosimi hali ham yuqori ekanini ko‘rsatdi.
Shu sababli Federal Reserv yaqin vaqt ichida foiz stavkalarini pasaytirmasligi mumkinligi haqidagi kutilmalar kuchaydi.
CoinGlass ma’lumotlariga ko‘ra, so‘nggi 24 soat ichida kriptovalyutalarning umumiy likvidatsiyasi taxminan 344 mln dollarni tashkil etdi. Qisqa muddatli likvidatsiyalar umumiy hajmning taxminan 83 foizini tashkil qildi.
DOT kripto tokeni narxi keskin o‘sdi
Bugun DOT tokeni narxi 8,19 foizga ko‘tarilib, 1 598 dollarga yetdi.
Bozor tahlili shuni ko‘rsatdiki, kripto bozorida riskli aktivlarga umumiy qaytish tendensiyasi va bitkoin narxining yuqorilashi altkoinlar, jumladan, DOT narxini ham oshirmoqda.
Aytilishicha, investorlar xavfsiz aktivlardan voz kechib, yuqori daromadli tokenlarga sarmoya kirita boshlagan.
Micron kompaniyasi ilg‘or chiplar ishlab chiqarishni kengaytirmoqda
16-mart kuni Micron aksiyalari 5,13 foizga oshib, 426 dollarga yetdi.
Kompaniya ilg'or DRAM va HBM chiplarini ishlab chiqarish quvvatini kengaytirish uchun Tayvandagi PSMC Tongluo P5 zavodini sotib oldi.
Shuningdek, kompaniya 2026-yil oxirigacha shunga o‘xshash ikkinchi Tongluo P5 inshootini qurishni rejalashtirmoqda.
Bu esa kompaniyaning kelajakdagi istiqbollariga ijobiy ta’sir ko‘rsatmoqda.
Adobe aksiyalari hukumatga tovon to‘laganidan so‘ng tushib ketdi
16-mart kuni Adobe aksiyalari 7,58 foizga pasayib, 553,249 dollarga tushdi.
Bunga kompaniyaning AQSh hukumati bilan kelishib, foydalanuvchilardan obunani bekor qilish uchun olinadigan murakkab to‘lovlar bo‘yicha da’volarni hal qilishga qaror qilgani sabab bo‘ldi.
Kompaniya bu kelishuv doirasida 75 mln dollar naqd pul va 75 mln dollar qiymatidagi xizmatlarni taqdim etadi.
Qimmatbaho metallar yana arzonlamoqda
16-mart kuni oltinning bir troy unsiyasi narxi 0,73 foizga pasayib, 5022 dollarga tushdi.
Kumush esa shu davrda 2,52 foizga arzonlab, 79,17 dollarni tashkil etdi.
AQSh Markaziy bankining foiz stavkalarini pasaytirish ehtimoli kamaygani qimmatbaho metallar narxining tushishiga olib keldi.
Natixis tahlilchisining so‘zlariga ko‘ra, oltin bozori o‘z e’tiborini Ho‘rmuz bo‘g‘ozidagi savdoning to‘xtatilishi oqibatlariga emas, balki uzoq muddatli inflyatsiya oqibatlariga qaratgan.