AQSh bozor indekslari katta zarar ko‘rdi
30-mart kuni AQShning yetakchi indekslari qiymati tushib ketdi.
Jumladan, Dow Jones 1,73 foizga, S&P500 1,67 foizga va Russell 2000 1,75 foizga pasaydi.
Eng katta yo‘qotish Nasdaq indeksida kuzatilib, u 2,15 foizga quladi.
Eron atrofida yuz berayotgan mojarolar investorlarni riskdan qochishga undamoqda.
Bu esa, o‘z navbatida, yirik kompaniyalar aksiyalari narxiga salbiy ta’sir ko‘rsatmoqda.
Wall Street’ning asosiy indekslari 27-mart kuni ketma-ket beshinchi haftani pasayish bilan yakunladi.
Dow, Nasdaq va Russell 2000 aksiyalari qariyb 10 foizga tushib, pasayish bosqichiga kirdi.
Yirik valyutalardagi o‘zgarishlar
30-mart kuni dollarning boshqa valyutalarga nisbatan kursini kuzatuvchi AQSh dollari indeksi 0,2 foizga o‘sib, 100,34 punktga yetdi.
Yevro kursi 0,2 foizga pasayib, 1,1483 dollarni, Britaniya funti esa 0,2 foizga arzonlab, 1,3232 dollarni tashkil etdi.
Dollar 10 oylik eng yuqori ko‘rsatkichga yaqinlashishi bilan birga, 2025-yil iyulidan beri eng katta oylik o‘sish sur’atini ham qayd etdi.
Eronning janubiy qirg‘og‘idagi muhim suv yo‘li bo‘lgan Ho‘rmuz bo‘g‘ozining yopilishi sababli bozorlarda beqarorlik yuzaga keldi.
Bu bo‘g‘oz bir necha hafta davomida xom neft tankerlarini tashish uchun amalda yopib qo‘yilgan edi.
Natijada neft narxlari keskin ko‘tarildi. Bu esa dunyo mamlakatlarida inflyatsiya bosimining kuchayishi borasidagi xavotirlarni oshirdi.
Kriptovalyuta bozori yetarlicha tiklanmadi
Bittensor kriptoaktivi 4,07 foizga pasayib, 340 dollardan 313 dollargacha tushib ketdi. Bu pasayish biror maxsus salbiy hodisa bilan bog‘liq emas.
Bitkoin narxining ham taxminan 71 000 dollardan 66 000 dollarga tushishi altkoinlarda riskdan qochish bosimini oshirdi.
Mutaxassislar bu harakatni bozorning haddan tashqari qizib ketishi va ajiotajdan keyingi tabiiy konsolidatsiya deb baholadi.
Bittensor hamon hajm va steyking faolligi bo‘yicha nisbiy barqarorlikni saqlab qolmoqda.
Bitkoin esa 27-martdagi katta yo‘qotishlardan so‘ng 0,73 foizlik o‘sish bilan tiklanmoqda. Ammo narx 67 000 dollar bilan hamon past darajada qolmoqda.
Oltin va neft narxining kunlik o‘zgarishi
30-mart kuni Brent markali xom neft narxi 2,5 foizga o‘sib, bir barrel uchun 108 dollardan sotildi.
WTI markali neft narxi esa 3 foizga oshib, 102 dollarga yetdi.
Bu o‘sish asosan Yaqin Sharqdagi geosiyosiy keskinlik va bozor xatarlari ta’sirida yuz berdi.
Oltin narxiga kelsak, qimmatbaho metalning bir troya unsiyasi bugun 4 550 dollardan 4 580 dollargacha ko‘tarildi.
Bu oltin narxining avvalgi kunga nisbatan 1 foizga oshganini anglatadi.
Mazkur o‘sish bozorda xavfsiz aktiv sifatida oltinga bo‘lgan talab ortgani bilan izohlanmoqda.