2026-yilning mart oyida oltin quymalari narxlari sezilarli darajada o‘zgarib turdi.
Fevral oyi oxirida Eron atrofidagi mojarolarning boshlanishi oltin narxining oshishiga katta ta’sir ko‘rsatdi.
Natijada 3-martga kelib O‘zbekistonda bir gramm oltin quymasining narxi 2 mln 173 ming so‘mni tashkil etdi.
Bu tarixiy maksimum hisoblanadi. Biroq mart oyining keyingi kunlarida narxlarning pasayishi kuzatildi.
27-martga kelib esa bir gramm quyma narxi 1 mln 791 ming so‘mni tashkil etdi.
Bu mart oyidagi eng yuqori ko‘rsatkichdan 21,3 foizga kamdir.
Shunga qaramay, narxlar 2025-yilning mart oyidagi maksimumdan 37 foizga yuqori bo‘lib turibdi.
27-martdan so‘ng narxlar oy oxirigacha o‘sib bordi va oy oxirida bir gramm quyma narxi 1 mln 829 ming so‘mni tashkil qildi.
Mart oyi oxiridagi narx o‘sishiga asosan geosiyosiy noaniqliklar ta’sir ko‘rsatmoqda.
Shuningdek, dollarning biroz zaiflashishi ham qimmatbaho metall narxiga ijobiy ta’sir etmoqda.
2-aprel, soat 10:27 holatiga ko‘ra, jahon bozorida oltinning bir troy unsiyasi 4680 dollarni tashkil qilmoqda.
Goldman Sachs tahlilchilarining prognozlariga ko‘ra, yil oxiriga borib bu ko‘rsatkich 5400 dollarga yetadi.
Bank bu prognozini 22-yanvar kuni e’lon qilgan edi. 31-mart kuni e’lon qilgan prognozida ham ushbu ko‘rsatkichni o‘zgarishsiz qoldirdi.
Bank tahlilchilari mart oyidagi oltin narxining keskin tushishiga qaramay, o‘z prognozlarini o‘zgarishsiz saqlab qoldi.