2026-yil may oyida xarid cheklari Soliq mobil ilovasi orqali eng ko‘p ro‘yxatdan o‘tkazilgan korxonalar ro‘yxati e’lon qilindi.
Ro‘yxatning birinchi o‘rnini Korzinka supermarketlar tarmog‘i egallagan.
May oyida tarmoqning 6 mln 870 ming dona cheki Soliq mobil ilovasida ro‘yxatdan o‘tkazilgan.
Buning uchun cheklarni ro‘yxatdan o‘tkazgan iste’molchilarga jami 9,4 mlrd so‘m keshbek hisoblangan.
Infografika: Soliq qo‘mitasi
Soliq qo‘mitasi cheklari Soliq mobil ilovasida eng ko‘p ro‘yxatdan o‘tkazilgan korxonalar ro‘yxatini 2022-yil noyabr oyidan buyon e’lon qilib keladi.
Infografika: Soliq qo‘mitasi
Korzinka o‘sha vaqtdan beri ro‘yxatda peshqadamlik qilib kelmoqda. Undan keyingi o‘rinni esa Havas egallab kelayotgan edi.
2026-yilning may oyida Olma supermarketlar tarmog‘i Soliq mobil ilovasida ro‘yxatdan o‘tkazilgan cheklar soni bo‘yicha ilk bor Havas diskaunteridan o‘zib ketdi.
2024-yilning oktyabr oyida Olma bu borada Makro tarmog‘ini ortda qoldirgandi.
Infografika: Soliq qo‘mitasi
May oyida Olma tarmog‘ining 2 mln 635 ming dona cheki Soliq mobil ilovasida ro‘yxatga olingan bo‘lsa, Havas diskaunterida bu ko‘rsatkich 2 mln 438 ming donani tashkil etgan.
Biroq Havas iste’molchilarga hisoblangan keshbek miqdori bo‘yicha Olma tarmog‘idan oldinda bormoqda.
Olma supermarketlar tarmog‘i so‘nggi yillarda O‘zbekistonda jadal rivojlanmoqda.
2022-yil noyabr oyi uchun e’lon qilingan ro‘yxatda tarmoq 17-o‘rinda qayd etilgan edi.
Hozirda uning cheklari Soliq mobil ilovasida Korzinka tarmog‘idan keyin eng ko‘p ro‘yxatdan o‘tkazilayotgan cheklar bo‘lib turibdi.