Jamshid Rahmatboyevich Xayrullayev Tenge Bank boshqaruv raisining birinchi o‘rinbosari etib tayinlandi. Tegishli qaror bank kuzatuv kengashining 15-sentyabr kuni bo‘lib o‘tgan yig‘ilishida qabul qilingan.
Tayinlov Markaziy bank bilan kelishilgandan so‘ng rasman kuchga kiradi. Xayrullayev tayinlovga qadar Xalq Bankining Strategiya departamenti direktori lavozimida ishlab kelayotgandi.
Jamshid Xayrullayev 1977-yilda tug‘ilgan. 1998-yilda Toshkent davlat texnika universitetining bakalavriat bosqichini, 2005-yilda Yaponiya xalqaro universitetining magistratura bosqichini tamomlagan.
Bank tizimidagi mehnat faoliyatini 1998-yilda UzDaewoo Bank (hozirgi KDB Bank Uzbekistan)ning G‘aznachilik bo‘limida mutaxassis lavozimidan boshlagan.
Keyinchalik ushbu bankda turli lavozimlarda, jumladan departament direktori lavozimida ishlagan. 2021-yildan 2023-yilgacha esa Ipoteka-bankda G‘aznachilik departamenti direktori lavozimida ishlagan.
2023-yilning iyun oyidan 2024-yilning iyul oyiga qadar Ipoteka-bank boshqaruv raisining o‘rinbosari – Korporativ boshqaruv bloki rahbari, Boshqaruv a’zosi sifatida faoliyat yuritgan.
Tayinlovga qadar Jamshid Xayrullayev Xalq Bankining Strategiya departamenti direktori lavozimida ishlab kelayotgandi.