Moldovalik mutaxassis Serjiu Choklya O‘zsanoatqurilishbank kuzatuv kengashining raisi etib saylandi.
Tegishli qaror 15-oktyabr kuni bo‘lib o‘tgan bank kengashi yig‘ilishida qabul qilingan.
Ungacha 2024-yildan buyon Odilbek Isoqov kengashga raislik qilib kelayotgandi. Uning vakolatlari 5-oktyabrdan boshlab tugatilgan.
Odilbek Isakov / Foto: Markaziy bank
Ma’lumot uchun, Isakov Odilbek Rustamovich 2019-yildan 2023-yilga qadar O‘zbekiston Respublikasi moliya vaziri o‘rinbosari lavozimida faoliyat olib borgan.
Serjiu Choklya haqida
Serjiu Choklya bank tizimida ko‘p yillik tajribaga ega mutaxassis bo‘lib, 1974-yilda Moldova poytaxti Kishinyovda tug‘ilgan.
2016-yil martidan 2018-yil noyabrigacha Moldova Respublikasi Markaziy banki raisi lavozimida faoliyat yuritgan.
2008-yil yanvaridan 2015-yil mayigacha esa BNP Paribas guruhining Rossiyadagi korporativ moliya departamenti rahbari va boshqaruvchi direktori bo‘lib ishlagan.
Bungacha ushbu bankning Fransiya va Buyuk Britaniyadagi bo‘linmalarida mehnat qilgan. 2021–2025-yillarda mustaqil moliyaviy maslahatchi sifatida faoliyat olib borgan.
Panteon-Assas universitetida (Fransiya) iqtisodiyot yo‘nalishi bo‘yicha magistrlik hamda oliy o‘quv yurtidan keyingi ta’lim (DEA) diplomlarini olgan.