2025-2026-yillarga mo‘ljallangan moliyaviy texnologiyalar sohasini qo‘llab-quvvatlash dasturi ishlab chiqildi.
Unga ko‘ra, fuqarolarga ish haqi tushadigan bank yoki elektron hamyonni o‘zlari mustaqil tanlash huquqi beriladi.
Markaziy bank raisi Timur Ishmetovga 2025-yil dekabr oyigacha bu boradagi chora-tadbirlarni ishlab chiqish vazifasi yuklatildi.
Ta’kidlanishicha, bundan ko‘zlangan maqsad bank xizmatlari va to‘lov xizmatlari bozorida majburiy mijozlardan voz kechish orqali raqobatni kuchaytirishdir.
Shuningdek, dasturga aholining bank hisobvaraqlari orqali pul o‘tkazmalarini real vaqt rejimida amalga oshirish kiritilgan.
Buni ishlab chiqish muddati 2026-yilning 1-fevraliga belgilangan.
Bundan tashqari, 2026-yilning iyun oyigacha Markaziy bank tomonidan boshqariladigan to‘lov tizimlarida ommaviy to‘lovlar funksiyasini yaratish topshirildi.
Mazkur funksiya ishga tushgach, bir nechta to‘lovni bir vaqtning o‘zida, yagona tizim orqali amalga oshirish imkoniyati paydo bo‘ladi.
Avvalroq, O‘zbekistonda "open banking" tizimi joriy etilayotgani haqida xabar bergandik.