O‘zbekistonda inflatsiya darajasi noyabr oyida 7,5 foizni tashkil etdi. Bu ko‘rsatkich oktyabr oyiga nisbatan 0,3 foiz bandga, o‘tgan yilning noyabr oyiga nisbatan esa 2,5 foiz bandga pasaygan.
Taqqoslash uchun, 2025-yilning iyul oyida yillik inflatsiya darajasi 8,9 foiz edi. Bu uch oy ichida inflatsiya darajasi 1,4 foiz bandga kamayganini anglatadi.
Ma’lumot uchun, Markaziy bank inflatsiya darajasini 5 foizga tushirishni maqsad qilgan.
Markaziy bankning rasmiy veb-saytida 2016-yil yanvaridan keyingi davr uchun yillik inflyatsiya ko‘rsatkichlari e’lon qilingan.
Unga ko‘ra, 2025-yil noyabr oyidagi yillik inflyatsiya darajasi 2016-yil yanvaridan keyingi davrdagi eng past ko‘rsatkich hisoblanadi.
2016-yil yanvaridan keyingi davrda kuzatilgan eng yuqori yillik inflyatsiya esa 2018-yilning yanvar oyida (20,1%) qayd qilingan.
Noyabr oyida narxlar qanday o‘zgardi?
Noyabr oyida oziq-ovqat mahsulotlari narxlari o‘rtacha 1 foizga, nooziq-ovqat tovarlari 0,5 foizga, aholiga ko‘rsatiladigan pullik xizmatlar esa 0,3 foizga qimmatladi.
Asosiy oziq-ovqat mahsulotlaridan bodring (96,0%), pomidor (82,2%), bulg‘or qalampiri (61,2%), baqlajon (51,7%) narxlarining sezilarli darajada oshgani kuzatildi.
Inflatsiyaning pasayishiga yuqori hissa qo‘shgan oziq-ovqat mahsulotlari esa sabzi (-26,1%), sholg‘om (-7,1%), barcha navdagi guruch va guruch (-4,5%), loviya (-4,2%), shakar (-2,9%), piyoz (-2,5%), banan (-1,3%) hamda parranda go‘shti (-1,2%) bo‘ldi.
Nooziq-ovqat mahsulotlari tarkibida esa propan (7,4%), benzin (1,7%), sement (1,4%) hamda kiyim-kechak va poyabzal (0,7%) narxlarida o‘sish qayd etildi.