2025-yil 15-dekabr kuni o‘tkazilgan yig‘ilish natijalariga ko‘ra, Asakabank umumiy qiymati 1 trln so‘mlik korporativ obligatsiyalarni chiqarishga qaror qildi.
Ushbu emissiya doirasida bank tomonidan 2 000 dona obligatsiya chiqariladi.
Har bir obligatsiyaning nominal qiymati 500 mln so‘mni tashkil etib, umumiy chiqarilish hajmi 1 trln so‘mga yetadi.
Obligatsiyalarning muomalada bo‘lish muddati ularni joylashtirish boshlangan kundan boshlab 5 yil etib belgilangan.
Korporativ obligatsiyalar bo‘yicha yillik daromadlilik 18 foizni tashkil etadi va foizli daromadlar har 90 kunda bir marta to‘lanadi.
To‘lovlar Qimmatli qog‘ozlar markaziy depozitariysi orqali obligatsiya egalari reyestri asosida amalga oshiriladi.
Bank obligatsiyalarni muddatidan oldin so‘ndirish imkoniyatini ham ko‘zda tutgan bo‘lib, bu huquq joylashtirish boshlanganidan 3 yil o‘tgach amalga oshirilishi mumkin.
Bunday holatda obligatsiyalar nominal qiymatda qaytarib olinadi va daromad yillik 18 foiz stavkadan kelib chiqib hisoblanadi.
Joylashtirish ochiq obuna yo‘li bilan, potensial investor bo‘lishi mumkin bo‘lgan yuridik shaxslarning cheklanmagan doirasi orasida amalga oshiriladi.
Obligatsiyalar fond birjasi va birjadan tashqari bozorda muomalada bo‘lishi mumkin.
Hozircha obligatsiyalarning chiqarilish sanasi e’lon qilinmagan. tanga.uz bu borada ma’lumot berib boradi.
Obligatsiya nima?
Obligatsiya — bu kompaniya yoki davlat tomonidan chiqariladigan qarz qimmatli qog‘ozi hisoblanadi. Uni sotib olgan investor aslida emitentga ma’lum muddatga pul qarz beradi.
Emitent esa belgilangan muddat davomida foiz to‘lab borish va muddat oxirida obligatsiyaning nominal qiymatini qaytarish majburiyatini oladi.
Obligatsiyalar odatda barqaror daromad manbai sifatida qaraladi. Chunki ular bo‘yicha daromad oldindan ma’lum bo‘ladi va foiz to‘lovlari qat’iy jadval asosida amalga oshiriladi.
Masalan, yillik 18 foizli obligatsiya egasi har chorakda yoki yarim yilda daromad olib turadi. Obligatsiyalarni davlatlar, banklar yoki yirik kompaniyalar chiqarishi mumkin.
Davlat obligatsiyalari eng ishonchli vositalardan biri sanalsa, korporativ obligatsiyalar odatda yuqoriroq daromad taklif qiladi, biroq ularda xatar darajasi nisbatan yuqoriroq bo‘ladi.
Xulosa qilib aytganda, obligatsiya bu oldindan ma’lum daromad va aniq muddatga ega bo‘lgan investitsiya vositasi bo‘lib, kapitalni saqlash va barqaror daromad olishni istagan investorlar uchun qulay moliyaviy instrument hisoblanadi.