Navoiy kon-metallurgiya kombinati 2025-yil yakunlari bo‘yicha moliyaviy ko‘rsatkichlarini e’lon qildi.
Hisobotga ko‘ra, kombinat yilni 3,5 mlrd dollar sof foyda bilan yakunlagan.
Bu ko‘rsatkich kombinatning 2024-yildagi sof foydasidan 1 mlrd 365 mln dollarga yoki 64 foizga ko‘proqdir.
Infografika: tanga.uz
Kombinatning daromadi esa 3 mlrd 432 mln dollarga ko‘payib, 10 mlrd 827 mln dollarni tashkil etdi.
Operatsion xarajatlar ham o‘z navbatida 1 mlrd 155 mln dollarga oshib, 4 mlrd 622 mln dollarga yetdi.
Daromadning oshishiga oltin narxining yil davomida sezilarli darajada ko‘tarilgani hamda sotish hajmining ortgani asosiy omil bo‘ldi.
Ishlab chiqarish
Navoiy kon-metallurgiya kombinati 2025-yilda 98 tonna oltin ishlab chiqardi. Bu 2024-yilga nisbatan 2 tonnaga ko‘p.
2024-yilda kombinatning ishlab chiqarish va uni qo‘llab-quvvatlash bo‘yicha umumiy xarajatlari 1 troy unsiyasi uchun 979 dollarni tashkil etgan.
2025-yilda bu ko‘rsatkich 379 dollarga oshib, 1 358 dollarga yetdi.
Bu o‘sish yer qa’ridan foydalanganlik uchun soliqning ko‘paygani, tog‘ jinslarini qazib olish hajmining oshgani hamda sarflanadigan materiallar narxiga inflyatsiya ta’siri bilan izohlandi.
Kombinat haqida
Navoiy kon-metallurgiya kombinati jahonda oltin ishlab chiqaruvchi eng yirik to‘rtta kompaniyadan biridir.
U O‘zbekistondagi eng yirik soliq to‘lovchi hamda eng yaxshi ish beruvchi hisoblanadi.
2025-yil yakunlariga ko‘ra, kombinatdagi xodimlar soni 50 mingdan oshgan.
NKMKning asosiy aktivlari qatoriga resurs bazasi 100 mln unsiyadan ortiq bo‘lgan dunyodagi eng yirik oltin konlaridan biri — Muruntov koni kiradi.
Avvalroq, Olmaliq kon-metallurgiya kombinati 2025-yilda qariyb 1 mlrd dollar sof foyda olgani ma’lum bo‘lgandi.