2026-yil 1-aprel holatiga ko‘ra, 2 mln 207 ming nafardan ortiq fuqaro o‘ziga kredit olishni cheklab qo‘ygan.
Bu haqda Kredit-axborot tahliliy markazi (KATM) ma’lumot berdi.
Firibgarlikdan himoyalanish maqsadida “Kreditga taqiq” xizmati 2025-yilning iyun oyida joriy etilgan edi.
2026-yil 1-yanvar holatiga ko‘ra 438 322 nafar fuqaro o‘ziga kredit olishni cheklab qo‘ygani ma’lum bo‘lgandi.
1-aprelga kelib bu ko‘rsatkich besh barobardan ko‘proqqa oshib, 2 mln 207 ming 753 nafarga yetdi. Xizmatga ulanganlarning katta qismini 26 yoshdan 35 yoshgacha bo‘lganlar tashkil etadi.
Infografika: KATM
2026-yil fevral oyi boshida millionlab o‘zbekistonlikning shaxsiy ma’lumotlari tarqalib ketgani haqida xabarlar tarqalgan edi.
Bu esa ko‘plab fuqarolarning kredit olishga taqiq xizmatini faollashtirishiga turtki bo‘lgandi.
Ma’lumot uchun, kreditga taqiqni KATM mobil ilovasi, my.gov.uz sayti orqali onlayn ravishda rasmiylashtirsa bo'ladi.
Shuningdek, Davlat xizmatlari markazlari orqali ham rasmiylashtirish mumkin. Xizmatdan foydalanish bepul.