Markaziy bank mart oyida ko‘rib chiqilgan masalalar yuzasidan axborot berdi.
Unga ko‘ra, bu oyda 20 ta bankka nisbatan jarima sanksiyalari qo‘llanilgan.
Bunga banklarning o‘z faoliyatini qonunchilik talablariga muvofiq tashkil etmagani hamda inspeksiya va o‘rganishlar davomida aniqlangan kamchiliklar sabab bo‘lgan.
Shuningdek, ayni shu kamchiliklar uchun 89 ta mikromoliya tashkiloti va 79 ta lombardga ham jarima sanksiyalari qo‘llanilgan.
Shu bilan birga, 17 ta bankka nisbatan chora va sanksiyalar qo‘llanilishi to‘g‘risida ogohlantirish berilgani ma’lum qilindi.
Ko‘rib chiqilgan masalalarning to‘qqiztasi esa kuzatuv kengashi va boshqaruvi aʼzolari hamda muhim ahamiyatga ega xodimlarining nomzodlarini koʻrib chiqish bilan bog‘liq.
Eslatib o‘tamiz, Markaziy bank fevral oyida 11 ta bankka nisbatan jarima sanksiyalari qo‘llagan edi.