Azizbek Ashurov TBC Bank boshqaruv raisi o‘rinbosari — bosh moliyaviy direktor lavozimiga tayinlandi.
Tegishli tayinlov bo‘yicha qaror bankning kuzatuv kengashi tomonidan 30-mart kuni qabul qilingan.
Bu tayinlov Markaziy bank tomonidan tasdiqlanganmi yoki yo‘qmi, hozircha ma’lum emas.
Biroq bankning rasmiy saytida hamon moliyaviy direktor sifatida David Gabelashvili ko‘rsatilgan.
Gabelashvili 2024-yil 23-yanvarda bank Kuzatuv kengashining qarori bilan ushbu lavozimdan ozod etilgan edi.
Azizbek Ashurov haqida
Azizbek Ashurovning LinkedIn sahifasida uning 2025-yil yanvar oyidan buyon UZCARD to‘lov tizimining bosh moliya direktori lavozimida ishlab kelayotgani qayd etilgan.
Ungacha esa qariyb 5 yil mobaynida TBC Uzbekistan ekotizimida ishlagani ko‘rsatilgan.
Jumladan, 2020−2022-yillarda ekotizimda Xalqaro moliyaviy hisobot standartlari (IFRS) bo‘yicha katta mutaxassis bo‘lib ishlagan.
2022-yildan 2024-yilgacha esa Moliyaviy rejalashtirish va tahlil bo‘limi boshlig‘i lavozimida faoliyat yuritgan.
Ashurov Azizbek Elmurod o‘g‘li 2016-yilda Toshkent moliya institutini tamomlagan.
Skrinshot: LinkedIn
Mehnat faoliyatini 2016-yilda Asia Alliance Bank buxgalteriya bo‘limining katta mutaxassisi sifatida boshlagan.
2018-yilning oktyabr oyigacha esa bankda buxgalteriya bo‘limi bosh mutaxassisi bo‘lib ishlagan.
2018-yildan 2020-yilgacha KPMG Uzbekistan auditorlik tashkilotida faoliyat ko‘rsatgan.