Orif Butayev boshqa ishga o‘tganligi munosabati bilan Mikrokreditbankni vaqtincha boshqarish Ikrom Jumaniyozov zimmasiga yuklatildi.
Bu haqda bank kuzatuv kengashi majlisining tegishli bayonnomasida ma’lum qilingan.
Unga ko‘ra, Jumaniyozov 13-maydan boshlab yangi rahbar tayinlanguniga qadar bankni vaqtincha boshqarib turadi.
U 2022-yildan buyon mazkur bankda boshqaruv raisi o‘rinbosari lavozimida ishlab kelmoqda.
Eslatib o‘tamiz, 2020-yildan buyon Mikrokreditbankni boshqarib kelgan Orif Butayev 12-may kuni Prezident qarori bilan Chorvachilik va yaylov xo‘jaligini rivojlantirish agentligi direktori lavozimiga tayinlangan edi.
Ikrom Jumaniyozov haqida
Jumaniyozov Ikrom Karimbayevich 1985-yilda Qoraqalpog‘iston Respublikasida tug‘ilgan.
2006-yilda Toshkent davlat iqtisodiyot universitetini (bakalavr), 2008-yilda esa shu universitetning magistratura bosqichini tamomlagan.
Shuningdek, 2011-yilda Toshkent davlat yuridik institutini bitirgan. Mutaxassisligi — buxgalteriya hisobi va audit hamda yurisprudensiya.
Jumaniyozov mehnat faoliyatini 2007-yilda O‘zmilliybank tizimidagi Banklararo hisob-kitob markazining Xalqaro hujjatli operatsiyalar boshqarmasida boshlagan.
2013-yilga kelib, boshqarmaning 1-toifali mutaxassisi darajasiga ko‘tarilgan.
2013-yilda Moliya vazirligiga ishga o‘tib, u yerda 2022-yilgacha faoliyat yuritgan.
Uning vazirlikdagi so‘nggi lavozimi Axborot-hisoblash markazi direktori bo‘lgan.
2022-yil dekabr oyidan buyon esa Mikrokreditbank boshqaruv raisining o‘rinbosari lavozimida ishlab kelmoqda.