Tursunov Iskandar Umarjonovich AloqaBank boshqaruv raisining yoshlar tadbirkorligini qo‘llab-quvvatlash masalalari bo‘yicha o‘rinbosari etib tayinlanadi.
Bu haqda tegishli qaror bank kuzatuv kengashining 3-sentyabr kuni bo‘lib o‘tgan yig‘ilishida qabul qilingan.
Tursunov Iskandar Umarjonovich / Foto: Facebook
Yangi lavozim Prezident Shavkat Mirziyoyevning 30-iyul kuni yoshlar bilan ochiq muloqotda bergan topshirig‘i asosida joriy etildi.
Unga ko‘ra, AloqaBank boshqaruvida yoshlar tadbirkorligini qo‘llab-quvvatlashga mas’ul boshqaruv raisi o‘rinbosari lavozimini tashkil etish belgilangandi.
Kuzatuv kengashi qaroriga muvofiq, Iskandar Tursunov ushbu lavozimga tayinlanishi bilan birga bank boshqaruv a’zoligiga ham saylandi.
Buning uchun bank boshqaruv tarkibidagi o‘rinlardan biri bo‘shatildi. Hujjatda AloqaBank boshqaruvi 7 nafar a’zodan iborat bo‘lishi qayd etilgan.
Shu sababli, boshqaruv a’zosi bo‘lib kelgan Tursunov Oltiboy Umirzakovichning vakolatlari muddatidan oldin tugatilib, uning o‘rniga Iskandar Tursunov kiritildi.
Iskandar Tursunov yangi lavozimga kirishishidan avval uning nomzodi Markaziy bank tomonidan ma’qullanishi lozim. Shundan so‘ng tayinlov rasman kuchga kiradi.
Avvalroq, AloqaBank yoshlar biznesi dasturi doirasida ustav kapitalini 854 mlrd so‘mga oshirayotgani ma’lum bo‘lgandi.