Davr Bank kuzatuv kengashi tarkibi yangilandi, boshqaruvga esa ikki nafar ABB vakili kiritildi

14.10.2026 14:33

O'zbekchaРусский

Davr Bank aksiyadorlari kuzatuv kengashining to‘liq tarkibini muddatidan oldin almashtirdi, shuningdek, bank boshqaruviga Ozarbayjon Xalqaro banki (ABB) vakillaridan ikki nafar rais o‘rinbosari tayinlandi. Bank nomi esa avval xabar qilinganidek ABB Davr nomiga o‘zgartiriladi.

Davr Bank kuzatuv kengashi tarkibi yangilandi, boshqaruvga esa ikki nafar ABB vakili kiritildi

^{Foto: Davr Bank}

9-oktyabr kuni Toshkent shahrida Davr Bank aksiyadorlarining navbatdan tashqari umumiy yig‘ilishi bo‘lib o‘tdi.

Ushbu yig‘ilish ABB bankning nazorat paketini sotib olganidan so‘ng yangi aksiyadorlar qatnashgan ilk yig‘ilish bo‘ldi.

Unda aksiyadorlar tomonidan qabul qilingan qarorlar 13-oktyabr kuni Korporativ axborot yagona portalida e’lon qilingan.

Bank kuzatuv kengashi tarkibi to‘liq yangilandi

Aksiyadorlar kuzatuv kengashining amaldagi tarkibi vakolatlarini muddatidan oldin tugatdi.

Kengash tarkibidan bank ta’sischisi va kengash raisi Lutfulla Ubayev, shuningdek, Mirkodir Mirzayatov, Atham Alimov, Ozoda Abdurahmonova hamda Shavkat G‘iyosov chiqarildi.

Yangi kengash vakolatlari har yili tasdiqlab borilishi sharti bilan 3 yil muddatga saylandi.

Uning tarkibiga ABB boshqaruvi raisi o‘rinbosarlari Taleh Tahirli va Agshin Amirov, mustaqil a’zolar sifatida esa Shafag Hasanova, Said Abdunabiyev va Farhod Roziyev kiritildi.

Lutfulla Ubayev bundan buyon kengash majlislarida ovoz berish huquqisiz, kuzatuvchi sifatida ishtirok etishi belgilandi.

Boshqaruvga ABB vakillari qo‘shildi

Boshqaruv tarkibidan rais o‘rinbosari Ravshan Tojiyev hamda rais o‘rinbosari vazifasini bajaruvchi Alisher Qurbonov chiqarildi.

Ularning o‘rniga ABB boshqaruvchi direktori Aynur Suleymanli va ABB boshqaruvi raisi maslahatchisi Geybat Gadirov rais o‘rinbosari etib tayinlandi.

Boshqaruv 3 yil muddatga quyidagi tarkibda tasdiqlandi: rais Abdumajid Samadov, rais o‘rinbosarlari Aynur Suleymanli, Geybat Gadirov va Samarjon Nazarov.

E’lon qilingan yangi tarkibda risk-menejment departamenti direktori Nodir Xalilov ham bor.

Vakolatlari tugatilgan kengash va boshqaruv a’zolari yangi nomzodlar Markaziy bank bilan kelishilib, lavozimga kirishgunga qadar o‘z vazifalarini bajarishda davom etadi.

Bank nomi va brendi o‘zgaradi

Aksiyadorlar bankning firma nomini “ABB Davr Bank” aksiyadorlik jamiyatiga o‘zgartirishni ma’qulladi. Yangi nom ustav davlat ro‘yxatidan o‘tkazilgan kundan boshlab qo‘llaniladi.

Bank faoliyatida ABB Davr tijorat belgisi ishlatiladi, boshqaruv esa uni tovar belgisi sifatida ro‘yxatdan o‘tkazishni ta’minlaydi.