20-may kuni Yevropa Ittifoqi 17-sanksiyalar paketini e’lon qildi.
Ittifoq ushbu paketga Ukrainaga qarshi bosqinchilik urushida Rossiya harbiy sanoatini qo‘llab-quvvatlagan kompaniyalar kiritilganini ma’lum qilgan.
Sanksiyaga kiritilgan kompaniyalar orasida O‘zbekistonda faoliyat yurituvchi "Trade Engine System" MChJ ham bor.
Mazkur kompaniya Toshkent shahrining Yakkasaroy tumanida ro‘yxatdan o‘tgan. Kompaniyaning ta’sischisi va rahbari sifatida Nosirjon Akbarov ko‘rsatilgan.
Kompaniya elektron va telekommunikatsiya uskunalari hamda ularning ehtiyot qismlari ulgurji savdosi bilan shug‘ullanadi.
Eslatib o‘tamiz, joriy yilning 9-may kuni Ukraina hukumati bir qator korxonalarga 10 yillik sanksiyalar paketini e’lon qilgandi.
Ular orasida O‘zbekistonda ro‘yxatdan o‘tgan 3 ta kompaniya ham bor edi.
Shuningdek, 3 ta kompaniyadan 2 tasining ta’sischisi hisoblangan Rossiya va O‘zbekiston fuqarosi Rustam Muminov ham sanksiyalar ro‘yxatiga kiritilgandi.